مش عارف ... أنا حاسيبكم تحكموا على الموضوع ده
- الشعب خرج منه ملايين يقولوا "الشعب يريد إسقاط النظام" ، و أنا كنت فاكر لحد وقت قريب جداً إن الدستور ده جزء من النظام ، لأن الدستور كان بيحمي النظام و بيدي له صلاحيات رهيبة ، بس فيه ناس بتقول لك لأ ... الدستور مش هو النظام ... أوكيه
- طلع الرئيس المخلوع مبارك و قال إنه "تخلى" عن السلطة للمجلس الأعلى للقوات المسلحة ، و ده مخالف للدستور اللي بيقول إنه في حالة عدم استطاعته القيم بعمله فإن العمل يوكل لنائب الرئيس أو رئيس مجلس الوزراء (مادة ٨٢) أو لو إستقال يقدم استقالته لمجلس الشعب (مادة ٨٣) أو لو خلا المنصب لأي سبب يبقى الرئيس المؤقت رئيس مجلس الشعب أو (لو المجلس محلول) رئيس المحكمة الدستورية العليا (مادة ٨٤) . ما فيش أي حاجة من دي حصلت...! يبقى كده الدستور سقط و لا احنا كسرنا الدستور ؟ و لو الشعب اللي الدستور نفسه بيقول إن السلطات مستمدة منه (مادة ٣) كسر الدستور ، يبقى الشعب أسقط الدستور و لا لأ؟ ما علينا من الموضوع ده...!
- المجلس العسكري اللي مسك الحكم أصدر قرار بحل مجلسي الشعب و الشورى و "تعطيل العمل بالدستور" . الحقيقة إن الدستور ما فيهوش أي حاجة تقول إن المجلس العسكري يحل مجلسي الشعب و الشورى و لا فيه حاجة من أساسه تقول إن فيه أي مخلوق ممكن يعطل العمل بالدستور . لو اعتبرنا إن المجلس العسكري هو اللي مسك الرئاسة بدل مبارك (و لو إن ده في حد ذاته بيعارض الدستور) ، فما فيش حاجة في الدستور تقول إن أي حد في مصر ممكن يعطل العمل بالدستور . هل يعتبر ده إسقاط للدستور من السلطة الحاكمة؟ بيتهيأ لي كده...!
- الجيش أصدر إعلان دستوري مؤقت ... جميل جداً ... الإعلان ده بيلغي الدستور القديم و لا بيعمل إيه بالظبط؟ قال لك لأ الدستور القديم معطل . يعني حد حا يصلحه و يشتغل تاني و لا النظام إيه؟ الله أعلم
- طيب لما هو دستور ١٩٧١ ساقط و متنيل على عينه ، أومال احنا رايحين الإستفتاء ندلي بأصواتنا على إيه؟ على التعديلات الدستورية ...! طيب حا نعدل في أنهي دستور؟ في دستور ١٩٧١....! يعني مش في الإعلان الدستوري بتاع الجيش؟ لأ مش في ده...! أومال مش كنا بنقول الدستور ساقط؟ لأ الدستور معطل بس و لما تقول نعم على التعديلات يبقى إتصلح و إن شاء الله يمشينا كده قيمة سنة و لا حاجة لحد ما نشوف لنا دستور جديد . طيب و ليه نعدل في دستور ساقط بدل ما نعمل دستور جديد؟ علشان الجيش بيقول إنه زهق و عاوز يمشي ، و الناس خايفة الجيش يفضل قاعد على طول ...!
سؤال... هو مش الدستور ده شرعيته من الشعب برضه؟ أيوه صحيح ... مظبوط ١٠٠٪ ... طيب و لما هو الشعب أسقط الدستور و الجيش نفسه أسقط الدستور بمخالفته ، يبقى الدستور ده مش برضه فقد شرعيته ؟ أيوه بس احنا حا نرممه و حا يبقى فل إن شاء الله ، و هي يعني سنة مش أكتر نعديها بالطول و لا بالعرض .
سنة نعديها بالطول و لا بالعرض...؟! طيب ما كنا إستنينا على مبارك الكام شهر دول بقى و خلاص ، و أهم كانوا حا يبقوا أقل من سنة و كنا وفرنا على نفسنا البهدلة دي كلها ...!
طيب يعني الدستور سقط و لا معطل و لا اخباره إيه اليومين دول؟
مش عارف ... روح إسأل الدستور
ليست هناك تعليقات:
إرسال تعليق