من طرائف انتخابات الرئاسة في مصر أن رئيس الوزراء الأسبق و مرشح الرئاسة الحالي الفريق أحمد شفيق اتسفخ كام جزمة طائرة من مواطنين مصريين في مختلف محافظات مصر، و اختتم المواطنون هذه السلسلة من السفخ بالجزم بشبشب طائر بصباع، و النكت طلعت بقى و كده. بيقول لك الصين هاتعمل جزمة بتلات فرد؛ واحدة يمين و واحدة شمال و واحدة شفيق. بيقول لك توفيق عكاشة بيقول للفريق شفيق لو عرفت تعد الجزم اللي اتحدفت بيها أنتخبك للرئاسة، يجرى إيه يعني؟! بس طبعاً أنا مش كاتب الكلمتين دول من قبيل الفكاهة و التندر بس! أكيد لي رأي في الكام مركوب اللي اتسفخهم شفيق.
إحنا شعب وسخ و لمامة، و لسه قدامنا سنين طويلة على ما نتحضر، ده في حالة إذا ما بدأنا محاولات التحضر من عشر سنين فاتت. إزاي يكون فيه مرشح لأرفع منصب في البلد و يتحدف بالجزم؟ المفروض إن فيه انتخابات حرة و نزيهة، و اللي مش عاجبه شفيق ما ينتخبوش. بس كده...! ليه يحدفه بالجزمة؟ و هل ده جاب حق حد من اللي ماتوا أو أصيبوا بعاهات مستديمة؟ و هل ده ممكن يغير من رأي اللي هاينتخب شفيق؟ بالعكس، أنا شايف إن الناس اللي على الحدود و لسه مش شايفين إن شفيق جزء وسخ من النظام القديم بكل مساوئه، و إن دماغه دماغ عسكري حمار حافظ مش فاهم، و إنه عنده كمية نرجسية و غرور بنت كلب قلما يجود بها الزمان، الناس دول لما يشوفوا شفيق بيتحدف بالجزم هايعتبروه "شهيد معنوي" تعرض للهجوم و الأذى من قبل الغوغاء و الرعاع، و اللي بيفكر ينتخب شفيق و لا عمرو موسى ممكن يستقر على شفيق تعاطفاً معاه.
ده طبعاً غير إنه من غير المقبول أخلاقياً و مما يعاقب عليه قانونياً الاعتداء على المواطنين في الطريق العام بالضرب. واحد صاحبي حسه اتنبح بقى له شهور عمال يقول الثورة مش هاتعمل أي تغيير غير لما احنا من جوانا نتغير. لسه ما بنحترمش القانون و لا بنحترم نفسنا، و لسه مش عارفين إن الديمقراطية تعني إن أي ابن وسخة من حقه يترشح ما دامت تنطبق عليه الشروط، و اللي مش عاجبه ما يديهوش صوته. قانون العزل اللي البرلمان الهزلي ده أقره غير دستوري بكل تأكيد، لأنه بيعاقب بعض المواطنين بحرمانهم من حقوقهم السياسية بدون إدانة من المحكمة، يعني السلطة التشريعية بتقول للسلطة القضائية طز فيكي و في اللي يتشدد لك. و لما يبقى البرلمان اللي بيسن قوانين الدولة بيعمل كده، شوف انت بقى المواطن البسيط يعمل إيه.
هو احنا هانتحول من دولة ما حدش فيها بيحترم القانون بس الغلبان بيعمل كده من تحت لتحت و المفتري في العلن إلى دولة ما حدش فيها بيحترم القانون نهائياً؟ يا عم الحاج انت و هو بدل ما انتم فرحانين بالجزمة و لا الشبشب أبو صباع اللي اتحدف على شفيق روحوا كلموا نواب مجلس الخرا بتاعكم شوفوا مبارك لسه ما اتنقلش مستشفى طرة ليه و شوفوا بيتصرف عليه كام في المركز الطبي اللي هو قاعد فيه. بدل ما انتم فرحانين بالجزمة و الشبشب و الصباع أبو حبر أزرق و عمالين تتناقلوا صورهم، روحوا شوفوا الدستور مين هايكتبه و هايتكتب فيه إيه.
أما أنا فالجزمة لا تزال في رجلي، و مش عاوز أضرب بيها غير الجهل و التخلف و التعصب الأعمى و الفكر المتحجر و الهمجية، و لما نضرب دول بالجزمة هانبقى متحضرين و محترمين. بس دول ما بيتضربوش بالجزمة اللي في الرجل. دول بيتضربوا بالتعليم و التنوير. و علشان كده هاتفضل الجزمة في رجلي و هاتفضل في دماغ ناس تانيين.
ليست هناك تعليقات:
إرسال تعليق