يا عم الشمبانزي منك له

سمعت حكاية ظريفة جداً من فترة، و لا أدري مدى صحتها، بس ممكن فعلاً تكون حقيقية.

بيقول لك كان فيه عالم عاوز يعرف تأثير "العقل الجماعي"--إذا صح التعبير--على سلوك القرود. جاب ٥ قرود و حطهم في قفص كبير مع بعض و في القفص كان فيه عامود كبير متعلق عليه موز من فوق، و كان فيه نظام إلكتروني في العامود بيستشعر لما قرد منهم يحاول يطلع العامود علشان ياخد من الموز اللي فوق، و ينشط رشاشات مية ساقعة تلج ترش كل القرود اللي في القفص (مش القرد اللي طلع العامود بس).

و النتيجة إن كل القرود كانوا بيتعاقبوا لما أي قرد منهم يحاول يطلع العامود علشان ياخد من الموز. و اتكون عند القرود رد فعل شرطي تمثل في انهم اصبحوا لو شافوا قرد منهم بيحاول يطلع العامود يمسكوه و ينزلوا فيه ضرب لما يطلعوا تلاتين أم اللي خلفوه.

الخطوة التانية من التجربة بدأت لما كل القرود بطلوا يطلعوا العامود علشان خوفهم من المية الساقعة. العالم شال قرد مهم و جاب بداله قرد جديد ما يعرفش حاجة عن الموضوع ده مطلقاً. طبعاً القرد الجديد بروح خالته لما دخل القفص شاف الموز عمل فيها السابع رجالة و ابتدى يحاول يطلع العامود، و كانت النتيجة المتوقعة إن باقي القرود ضربوه علقة سخنة ما كلهاش حمار في مطلع. و كل ما كان يحاول يطلع العامود ياخد نفس العلقة من باقي القرود.

و لما القرد الجديد ما بقاش جديد و إتطبع بطبع القرود اللي في القفص، شال العالم قرد من القرود القديمة و حط مكانه قرد جديد لنج برضه. و النتيجة إن القرود الأربعة الباقيين (بما فيهم القرد اللي كان جديد قبل كده) بقوا بيضربوه ضرب موت لما يحاول يطلع العامود. و استمرت التجربة بنفس الشكل لحد ما أصبح في القفص خمس قرود عمرهم ما إترش عليهم المية الساقعة أبداً، و بالرغم من كده كل القرود كانوا بيعملوا نفس السلوك، و اللي فيهم بيحاول يطلع العامود بينضرب لما يطلع تربت تيت أمه.

الخلاصة إن العقل الجماعي بتاع القرود الأربعة قدر يسيطر على القرد الجديد الخامس و يطبعه بطبع العقل الجماعي، بدون أي سابق معرفة و لا فهم و لا تشريط (conditioning) للقرد الجديد.

ناس كتير من الشعب المصري يشبهوا اللي حصل في التجربة دي. على مدار ٦٠ سنة من القهر و الإستبداد و فيه أجيال جديدة طالعة بتشوف القهر و الإستبداد على إنه الوضع الطبيعي في المجتمع. الأجيال دي شايفة إن تحدي السلطة خطر، حتى لو كان الخطر ده غير مبرر و حتى لو كانت السلطة دي معاقة فكرياً و مستبدة و ظالمة--هما إتربوا على كده.

المجلس العسكري هو السلطة الحالية المعاقة المستبدة المتواطئة اللامؤاخذة معرصة. الشعب خايف يترش بالمية، و ممكن تكون فيه ناس مش عارفة هي خايفة ليه، لكن إتربوا على إنهم يكونوا "عبد المأمور" و طول عمرهم ماشيين بمبدأ "خليك في حالك و ربي عيالك" و "العين ما تعلاش على الحاجب" و "ما يقدر على القدرة غير ربنا" و "امشي سنة و لا تخطي قناة" و "العين بصيرة و الإيد قصيرة" و غيرها من الأمثلة اللي طول عمرنا بنسمعها و بتربي فينا الشعور بالعجز و النقص و الصغر.

المجلس العسكري ده بياخد مرتبه من فلوسك و فلوس كل المصريين. المجلس العسكري ده مش بينتج حاجة و لا بيعمل حاجة مفيدة للبلد. الجيش عموماً مؤسسة إستهلاكية بالدرجة الأولى، بتستهلك أكتر بكتير ما بتنتج. الشعب بيدفع للجيش فلوس علشان يحمي البلد و يحمي الشعب. المجلس العسكري شغال عندنا مش احنا اللي تحت أمر سعادة جناب معالي اللي جابوا أبو أمه.

على فكرة... ممكن برضه في ظني إنه لو النظام اللي بيرش مية ساقعة ده اتوقف خالص، القرود برضه حاتفضل تطحن أم اللي يحول يطلع العامود علشان ياكل موز، من غير ما يجربوا يطلعوا العامود و يشوفوا حيغرقوا مية ساقعة و لا لأ.

يا عم الشمبانزي منك له، سيب القرد الجديد يطلع العامود يجيب موز. سيبه ما تضربوش. لو جه عليك شوية مية ساقعة استحمل حبة. القرد اللي بيطلع العامود ممكن يكون إتكهرب كمان بالإضافة للمية الساقعة. و لما القرد الجديد يجيب الموز الكل حيطفح منه. و لا إنت عاجبك طعم الخرة اللي بتاكله؟ و لا فاكر إنك مش حاينوبك من الموز نصيب؟ و لا يمكن حافظ مش فاهم؟

بالمناسبة أنا معترض على قطع الطريق و تعطيل قناة السويس، بس بدل ما تضربوا الناس دول بالجزمة دلوهم على الطريقة الصحيحة لتوصيل رأيهم و تضامنوا معاهم.

و لا إيه يا عم الشمبانزي منك له؟!!

إمضاء: نسناس خارج القفص