طب هو فين الظابط؟

فيه ناس من اصدقائي (و غير اصدقائي) المسلمين بيفكروني بمحمد صبحي في مسرحية الجوكر. فاكرين لما قعد يقول لمحمود القلعاوي "يابني لم التعابين يابني يا حبيبي..." و القلعاوي يرد عليه "هي فين التعابين؟" فمحمد صبحي قال "معلهش يا حضرة الظابط هايلم التعابين دلوقت"، فالقلعاوي إنترفز و قال "هي فين التعابين..؟ فين التعابين..؟ فين التعابين؟" قام محمد صبحي رد عليه بكل برود و قال له "طب هو فين الظابط؟"

تقول مهما تقول يا عمنا لأحبابنا المسلمين اننا ما بنعبدش تلات آلهة و إن احنا بنعبد إله واحد فقط مثلث الأقانيم و إن ده إسمه في الكنيسة عقيدة التثليث و التوحيد و تشرحها و تسهب في الشرح يقول لك برضه لأ بتعبدوا تلات آلهة. و فيه منهم من يزيد فتاكة و يقول لك "عباد الصليب" على إعتبار اننا بنعبد خشبة مش إله.

طب خد عندك دي. أنا بقى رأيي إن المسلمين بيعبدوا محمد مع الله. علشان تبقى مسلم لازم تقول الشهادتين، يعني ما ينفعش تقول "أشد ألا إله إلا الله" بس. علشان تصلي لازم تذكر محمد. الصلاة على محمد تكسبك حسنات علشان تدخل الجنة. محمد هو اللي هايشفع في المسلمين يوم القيامة. محمد--كنبي--معصوم من الخطأ و مختلف عن باقي البشر. الشيطان لا يجرؤ أن يتشبه بمحمد. سنة محمد تشكل جزء كبير جداً من العقيدة الإسلامية. الشرع الإسلامي مأخوذ عن القرآن و عن الأحاديث، مش القرآن بس.

بس أنا لو قلت الكلام ده لأي حد من المسلمين هايقول لي "إنت حمار يا حمار"؟ بمنتهى البساطة لأنك لو سألت المسلم إنت بتعبد محمد هيقول لك لأ. أقصد إيه أنا من الكلام ده؟ أقصد إن إيمان الشخص اللي قصادك تأخذه من فمه مش من دماغ أهلك. يعني لما المسلم يقول لك أنا ما باعبدش محمد يبقى تسمع اللي بيقوله لك و تفهم إن عقيدته ما فيهاش تعبد لمحمد. ما تعملش نفس أهلك فلحوس و تقول له "لأ إنت بتعبد محمد"، و لو عملت كده تبقى بجد حمار يا حمار.

المشكلة بقى انك تلاقي نفس المسلم اللي عاوزك تفهم عقيدته منه مش من دماغ أهلك بيفهم عقيدتك من دماغه بدون الرجوع إليك. و حتى بعد الرجوع إليك يقول لك لأ برضه إنت بتعبد تلات آلهة أو بتعبد خشبة. مش فاهمها أنا دي. فكرتني بمحمد صبحي في المسرحية. لما مسلم يقول لي إنت بتعبد تلات آلهة أقول له و إنت بتعبد محمد. يقول لي لأ ما باعبدش محمد أقول له لأ إنت بتعبد محمد. يتعصب و يقول لي لأ ما بعبدش محمد، قوم أنا أقول له و لا أنا باعبد تلات آلهة.

عارف نقطة الخلاف فين؟ نقطة الخلاف في تجسد السيد المسيح. المسيحيين بيقولوا إن السيد المسيح هو الله الظاهر في الجسد. المسلمين بيقولوا المسيح نبي مش إله. هي دي نقطة الخلاف. عاوز تقول على المسيحيين كفرة لأنهم بيقولوا المسيح هو الله قول براحتك خالص يا برنس، بس ما تقولش بيعبدوا تلات آلهة و لا تقول بيعبدوا خشبة و لا بيعبدوا شنودة (ربنا ينيح نفسه) علشان كده تبقى حمار يا حمار. فهمت؟