أنا عاوز اتكلم يا حبيبتي يا ام الشال
يسمع كلامي الناس و يرددوا اللي اتقال
أنا عاوز اتغزل في عينيكي يا سمرة
في الصبح لما طلع ماسك إيد القَمَرة
في النيل و في المركب... في النخل في المغرب
في جوك الدافي أو حتى لو زعبب
في وشوش ولاد أمي... شبهي و من دمي
قلبه على قلبي... همه على همي
في القبة و المدنة... في براءة اولادنا
في آلاف من الاعوام بترسم امجادنا
في السهرة في مذاكرة أو حتى على قهوة
في شقشقة فجرك و أذانه على سهوة
في العيد و لبس جديد... في الكحك و اللمة
في البمب و الصواريخ... مش حلوة بالذمة؟!
في القهوة و السحلب... في الشاي ابو النعناع
في اللمة ع الطعمية و الفول و أي بتاع
في الجدعنة البلدي و في رقة الجدعان
في البنت زي الولد بيعلموا الشجعان
في ترابك اللي ياما طَيِّن خطوط وشي
و غسلته من نيلك و رجعت فيه امشي
في الفاس و في المحرات... في التوتة و الساقية
في العشة جنب الغيط... في الشاي على الراكية
في حليم و في سومة... في عُبَد و في درويش
أسمع محمد فوزي... عَمَّار ده زيه ما فيش
أضحك مع سُمْعة... و القُصَري ويّا زينات
و اسرح مع فاتن... و زبيدة و طُلَيْمات
أنا عاوز اتكلم يا ضي في عيوني
يا نبض في عروقي... يا عقلي و جنوني
يا أهلي يا اصحابي... يا شِعْري في كتابي
يا لحم أكتافي... يا نعيمي و عذابي
يا غنوتي في الصمت... يا سكوتي وسط ضجيج
يا حلمي لما نمت... يا طوق نجاة م الموج
في غربتي فاكرك... و عقلي مشغول بك
ما هو لو نسيتك اموت. دي جدوري في أرضك
أنا عاوز اتكلم و اصرخ يا خلق يا هوه
نهبوا حبيبتي النَوَر و لا حتى قرش سابوه
أنا عاوز اتكلم يا ام الولاد أبطال
قتلوا الولاد الغجر... سحلوا الصبايا يا خال
أنا عاوز اتكلم يا أبِيَّة يا ام الشرف
خلوا الشرف متعاص... خلوا الإباء اتكسف
أنا عاوز اتكلم يا ام العقود ألماظ
ضربوا الولاد بالنار... خنقوا الولاد بالغاز
أنا عاوز اتكلم يا صاحبة الأمجاد
عرّوا البنات في الشارع... داسوا على الأولاد
أنا عاوز اتكلم يا هرم و يا بو الهول
سرقوني مش لاقي و لا حتى لقمة بفول
حرموني م البنزين... حرموني م الأنابيب
و الغاز بتاعك يامّه بعتوه لتل أبيب
أنا عاوز اتكلم و اكسر جدار الخوف
أنا مش عميل يا ناس و لا عمري خدت ألوف
و لا كلت كنتاكي و لا كنت بانديتّا
ده أنا اللي في الميدان بالبرد يتغطى
رَشُّوني بالمية... ضربوني بالحية
و آخرة ما غلبوا فيا فقعوا لي في عينيا
أنا قلت: "مش ماشي غير لو مِشُوا العسكر"
قام قال عليا واحد: "زنديق و راح يكفر"
و قالوا لي: "الاستقرار و عجلة الانتاج"
و قالوا لي: "أوعى البعبع ياكلك مع السحلاج"
و قالوا لي: "جاسوسية و أيادي خارجية"
و قالوا لي: "أوعى الحشيش و أوعى البلطجية"
و قالوا لي: "دول قلة" و قالوا لي: "مندسة"
و قالوا لي: "سيبك تعالى نلعب حلابسة"
أنا قلت: "دم اخواتي ع الأرض ما بردشي"
قالوا لي: "خد ديّة قرشين و رُوح امشي"
أنا قلت: "أختي اتعرت يا عرة الرجالة"
قال الخسيس: "ليه تنزل؟ تستاهل البهدلة!"
أنا قلت: "ما اقبلشي تتعرى! هتجنن!"
قال اللي قال: "يا سلام! يا واد انت يا مؤمن!"
قالوا: "احتفالية... خد جايزة و هدية"
قلت لهم: "آخد إيه؟ كام كشف عذرية؟!!!"
قالوا: "احنا اللي حمينا الثورة و الثورية
و اللي هايغلط فينا محكمته عسكرية!"
قالوا لنا: "الاستفتا... و الطرب و الكفتة
يدونا شرعية و نعوم على الفتة"
قالوا لنا: "بدلتنا كتان و شرعية
آدي الكتاتني اسأله! كتان مية مية!"
ورُّونا كتّافات كان نسرها لمّيع
و نجومها مرصوصة رصة صنايعي بديع!
أنا عاوز اتكلم... باصرخ و باتألم
ع اللي قتل صاحبي عمري ما راح اسلم
لو ابويا هايسامحه... أنا يامه مش قادر
ما هو يامه حق الدم مش لعبة الشاطر!
الحق مش هايضيع... الحق ما يموتشي
الحق ده ربنا! عينه ما بتنامشي
ليه يامّه اشوفك كده فستانك اتقطع
و الطرحة متبهدلة و الندل بيكركع
ليه يامّه اشوفك كده ع الارض متداسة
و ابن الكذا و الكيت بالعمة و اللاسة
ليه يامّه اشوفك كده و الدمع في عينيكي
أنا كلي يامه فداكي... شبيكي لبيكي
و غلاوتك الغالية يا ام الرجال الزين
يا ام الصبايا الحور... يا حب نني العين
لافرش طريقك ورد. في رقبتي عهد و دين
لازرع غيطانك مجد يا حلوة الحلوين
لاطرد ولاد الكلب و ارجّعك لولادك
لانفض تراب الذل و البّسك أمجادك
و ترجعي يامّه ملكة ملوك الناس
ييجوا البشر عندك و إيديكي دي تتباس
يتعلموا منك... يتغزلوا في حسنك
و أقول: "أنا المصري. من صلبك. أنا ابنك."
