كلمات: بيرم التونسي
الأبيات المكتوبة باللون الأزرق غير مؤكد نسبتها لبيرم التونسي
هتجن يا ريت يا خوانا مارحتش لوندن و لا باريز
دي بلاد تمدين و لطافة و ذوق و نضافة و حاجة تغيظ
ما لقيتش جدع متعافي و حافي و ماشي يقشر خص
و لا شحط مشرمخ أفندي معاه عود خلفة و نازل مص
و لا لب أسمر و سوداني و حمص و إنزل يا تقزقيز
هتجن يا ريت يا خوانا مارحتش لوندن و لا باريز
و لا واحدة في وش الفجر تبرطع ماليه الدنيا صوات
قال ايه جوز خالة ام أحمد سلفة أخوها السيد مات
سبحانك ما أعظم شانك و الله الموت ده مفيد و لذيذ
هتجن يا ريت يا خوانا مارحتش لوندن و لا باريز
و لا عركة في نص الليل دايرة بالحيل و ساحبها بوليس
قدامها جدع متجرجر و شه معور قال ده عريس
الخلق ما هي بتتجوز اشمعنى احنا ما فيش تمييز
هتجن يا ريت يا خوانا مارحتش لوندن و لا باريز
و لا صايع طالع يجري و صايع تاني بيجري وراه
و يقول هاهاع حصلتك يابن الأبصر ايه عاملاه
لا الشارع غيط يا جماعة و لا احنا بدارة و لا احنا معيز
هتجن يا ريت يا خوانا مارحتش لوندن و لا باريز
و لا واحد بيبيع حاجة يقول بريال و تاخدها بصاغ
يا خوانا دي حتى الابرة تاخدها بدوشة و قلب دماغ
و الداهية إن احنا قلاشوة و نكتة و فالحين في التأويز
(حلفان و عراك و مناهدة و يمكن ضرب كفوف يا حفيظ)
هتجن يا ريت يا خوانا مارحتش لوندن و لا باريز
و لا فيش ميت ألف صعيدي بتوع يانصيب هاجمين و لا فيش
و لا فيش ميت ألف معوض جاي و معاه صندوق ورنيش
و الله كرهت القهوه و حرمت أقعد ع الأفاريز
هتجن ياريت يا خوانا مارحتش لوندن و لا باريز
و لا شفتش ده اللي بلاسة و ده اللي بعمة و ده بطربوش
ملابسنا يا ناس تشكيلة تعد اصحابها ما يتعدوش
دول ناس كنا أحسن منهم قول و مسيرنا باذن الله
نبقى احسن منهم برضك بعد الدرس اللي أخدناه
و الله ده عيب نتهجى دروس يا أساتذة على التلاميذ
هتجن ياريت يا خوانا مارحتش لوندن و لا باريز
