الداخلية بتقول إن المظاهرات اللي طلعت دي كان وراها مجموعات محدودة ذات إتجاهات سياسية معينة ، و علشان يجيبوا من الآخر و يخلوا الناس تكش و يعملوا لنفسهم شرعية ، حطوا الإخوان المسلمين على رأس القائمة ، علشان يعرفوا يبرروا أي عنف تجاه المتظاهرين و أي مظاهر قمع للحريات و التعبير عن الرأي
خلونا بس نفكر شوية بالعقل ... كلنا شفنا الفيديوهات على الانترنت و شفنا مين اللي كان في المظاهرات بيهتف ضد الحكومة و ضد مبارك . أكيد مش كل دول اخوان مسلمين ... و البنات اللي طلعوا معاهم في المظاهرة دول كانوا من جماعة الأخوات المسلمات؟ طيب و البنات اللي مش لابسين حجاب ، اللي هما في الأغلب الأعم مسيحيات ، دول كانوا تبع مين؟ طيب و الممثلين و الكتاب و الصحفيين اللي نزلوا المظاهرة دول كانوا ماشيين ورا مين؟ طيب و الناس الغلابة اللي بيصرخوا من قلة الدخل و غلاء المعيشة و البطالة دول كانوا مع أنهي جماعة؟ طيب و الراجل العجوز اللي معظمنا شافه نايم على الأرض و بيقول "احنا مش مخربين ... عيالي مش لاقيين شغل ... فداكي يا مصر ... باحب ترابك يا مصر" ده كان تبع أنهي جماعة يا خلق هوووووووووه
بيقولوا إن الجماعات دي كنت السبب في إثارة الشغب ، و كل الناس اللي كانت في المظاهرة بيقولوا إن الدنيا كانت هادية نسبياً لحد ما المتظاهرين قرروا يباتوا في الشارع و يعتصموا . لحد هنا بقى و السيد اللواء حبيب العادلي قال ستوووب ، ما عنديش بنات تبات في الشارع...! الواقع إن الحكومة قالت خليهم يهبهبوا زي ما هما عايزين طالما مش ح يعملوا مشكلة أكتر من الهبهبة ، و بعد كده يروحوا بيوتهم و يفتكروا انهم جابوا الديب من ديله و يتفش غليلهم شوية ، لكن لما الحكومة لاقت إن الموضوع مش هبهبة و خلاص ، و إن المسألة داخلة في الجد ، قالت لأ لحد هنا و كفاية عليكم كده ، و كان لا بد على الحكومة انها تفرق المتظاهرين علشان الميدان يصبح نضيف و زي الفل و حركة المرور ترجع طبيعية و يبقى النظام الديمقراطي الجميل ساب الناس تعبر عن رأيها و الناس عبرت و روحت بيوتها و يا دار ما دخلك شر
بس المتظاهرين ما سمعوش الكلام...! الله...! نعمل فيهم إيه بقى دلوقت العالم اللبط دي؟ ما فيش حل غير اننا نضربهم علقة موت ، لكن نقول إيه للناس الأجانب لما يسألون ضربتوهم ليه؟ نقول إن الإخوان المسلمين دخلوا في وسط المتظاهرين و بدأوا أعمال الشغب ، و نقبض على حبة كده و أكيد ح يطلع فيهم واحد ولا اتنين من الاخوان المسلمين و ساعتها نلبسهم تهمة الشغب و التحريض عليه و تبقى خلصت
لكن المتظاهرين عددهم كبير جداً ...! نعمل إيه..؟ نقول إن الإخوان دفعوا بعناصر منهم حوالي عشرة آلاف لإثارة الشغب . طيب بالذمة ، لما الأمن في منطقة المظاهرة مكثف علشان "يحمي" المتظاهرين ذي ما بينخعوا علينا ، العشرتلاف دول دخلوا منين و ازاي يا بشر؟ هو احنا بنتكلم على عشرة انفار؟ دول 10,000 يعني يسدوا عين الشمس . و بعدين يعني ما سمعناش عن أسماء المقبوض عليهم من الإخوان المسلمين ولا عددهم .
مااااااا علينا...
قوم من يخاف بقى لما نقول الإخوان المسلمين....؟ الأقباط... الله ينور عليكم...! قوم ييجي البابا شنودة يقول للأقباط ما تخرجوش في مظاهرات و صلوا من أجل مصر . طيب ما كلنا بنصلي من أجل مصر ، و ح نصلي زيادة اليومين دول . بس ما فهمتش أنا بقى حكاية عدم النزول في المظاهرات دي ...! مش عارف البابا خايف إن الإخوان المسلمين يمسكوا الحكم ولا البابا خايف إن الأقباط يتقفشوا و احنا لسه ما خلصناش من اللي إتمسكوا في أحداث العمرانية و المظاهرات اللي حصلت بعد إنفجار الاسكندرية . و الحقيقة في الحالتين أنا مش شايف أي مبرر للدعوة بعدم النزول في المظاهرات
ما هو إن الإخوان المسلمين مسكوا الحكم ح يعملوا فينا إيه يعني أكتر من اللي اتعمل و اللي بيتعمل ؟ و أدينا بنطالب بحقوقنا مع النظام الفاسد ده و برضه لو الإخوان ما إدوناش حقوقنا ح نطالب بيها زي ما بنعمل دلوقت . خايفين يطبقوا الشريعة الاسلامية ؟ ما يطبقوها ...! أنا لا عايز أشوف مسيحي بيسرق ولا بيزني . خايفين يمنعوا بنا الكنايس؟ و هو يعني الكنايس بتتبني اليومين دول عمال على بطال؟ خايفين يمنعوا المسيحيين من الوصول للمناصب القيادية ؟ و هو فيه مسيحي محترم في منصب قيادي مع النظام القائم؟ خايفين يزودوا الاضطهاد على المسيحيين؟ طيب ما يزودوا...! و هي دي جديدة على الأقباط؟ و هو انتم برضه مش عارفين إن المسيح قال لكم "في العالم سيكون لكم ضيق و لكن ثقوا أنا قد غلبت العالم"؟ تبقوا خايفين من إيه بس...؟
و إن كان البابا خايف الأقباط يتمسكوا مع اللي عمالين يتمسكوا ، طيب هو المفروض يعمل لهم إيه يعني لو إتمسكوا؟ مش دول برضه مصريين زي اللي إتمسكوا؟ يعني هو شيخ الأزهر ولا المفتي ح يتدخل لما المسلمين يتمسك منهم ناس؟ ما يتمسكوا يا قداسة البابا ... سيبهم يتمسكوا و يحسوا انهم مصريين و بيشاركوا في تغيير بلادهم للأحسن . مش إنت اللي قلت مصر ليست وطناً نعيش فيه و لكن وطن يعيش فينا؟ سيبهم يخرجوا في المظاهرات و قول لهم ما يحدفوش طوب و ما يكسروش حاجة الناس و ما يضربوش حد ، لكن يخرجوا يقولوا رأيهم في بلدهم و يعرفوا الحكومة إن الأقباط برضه قرفانين و زهقانين و بيعانوا زي باقي الشعب ما بيعاني
النهاردة احنا مش جماعة 6 ابريل و لا جماعة كفاية و لا الإخوان المسلمين و لا الأقباط ، النهاردة احنا كلنا مصريين ، و الحكومة مش عايزنا ننطق و نقول آااااااااااااااايييييييييي ، الحكومة حظرتنا كلنا يا مصريين ... النهاردة احنا كلنا جماعة الإخوان المصريين المحظورة و كلنا ح نقف مع بعض
إذا كنت شايف نفسك من جماعة الإخوان المصريين المحظورة ، أنشر النوت دي ، خصوصاً للأقباط اللي زي حالاتي ، و ربنا يقف معنا كلنا و يحافظ على مصر لينا و لولادنا
ليست هناك تعليقات:
إرسال تعليق