هذا المقال يحتوي على صور لمظاهر عنف و قتل و دماء و لا ينصح بمشاهدة هذه الصور للأطفال أو ذوي القلوب الضعيفة.
أحاول في هذا المقال أن أجمع أكبر قدر ممكن من الصور التي نشرت على صفحات الإنترنت على أنها صور لضحايا الاضطهاد و الإبادة العرقية التي تتعرض لها الأقلية المسلمة في بورما، و أحاول أن أوضح ما يفيد هذه الأقلية و ما يضرها من جهة نشر مثل تلك الصور.
آدي أول صورة شفتها عن موضوع بورما و طلعت فشنك.
الصورة دي يا محترم من حادثة إنفجار عربية نقل محملة بنزين في جمهورية الكونغو الديمقراطية. آه و النعمة، و لو مش مصدق روح شوف الخبر منشور بتاريخ ٩ يوليو ٢٠١٠
فيه بقى صورة تانية بتاعة واحد مفتري إبن مفترية بيرمي عيل صغير ميت زي ما يكون بيرمي شوال بطاطس.
إبن الوسخة اللي بيرمي الواد ده طلع متصور في زلزال هايتي اللي حصل برضه في ٢٠١٠. طبعاً مش مصدق و بتقول عليا أنا اللي مفتري و إبن وسخة. روح شوف الصورة منشورة على الموقع بتاع جريدة الديلي ميل البريطانية.
فيه بقى شوية صورة الصراحة تقطع قلب الحجر يا جدع. عالم ميتة و مرمية كده على الأرض و لا الكلاب الميتة. خد عندك.
تصدق بقى إن الصور دي من بورما فعلاً؟ مش هتش يعني. بس الصور دي يا قمور من الإعصار اللي حصل في بورما سنة ٢٠٠٩. أكيد برضه مش هتسدقني علشان أنا مسيحي كافر. روح شوف الصور منشورة في المنتدى ده بتاريخ مارس ٢٠٠٩. و هتلاقي برضه الصور متعلم عليها بالاسود علشان يستروا العورات. طبعاً أكيد لسه مش مصدق. مش ممكن يا أخي يكونوا بيضحكوا عليك. طب آدي الصور في موقع تاني بس من غير ستر العورات، و بتاريخ ٢٠٠٨ المرة دي.
الصورة دي بقى أكيد ما فيهاش أي تزوير و لا غش. ما احنا عارفين إن المسلمين في بورما كانوا بيهربوا في قوارب و بيغرقوا.
بس الصورة دي يا حلو كانت غلاف مجلة التايم الأمريكية في ١٩ مايو ٢٠٠٨ بعد الإعصار اللي حصل في بورما اللي أنا لسه مكلم سعادة جنابك عنه في الفقرة اللي فاتت. لو عندك وقت ممكن تشوف غلاف المجلة منشور على صفحتها الرسمية.
فيه بقى صور اكيييييييييييدة مؤكدة لرهبان بوذيين كفرة ولاد ستين جزمة بيحرقوا جثث المسلمين بعد ما موتوهم. الله ينتقم منهم و يورينا فيهم يوم قادر يا كريم.
الرهبان دول فعلاً كانوا بيحرقوا جثث أموات، بس دول ما كانوش مسلمين و لا كانوا في ديك أم بورما أصلاً. دول ضحايا زلزال حصل في الصين في ابريل سنة ٢٠١٠ . أكيد طبعاً مش هاتصدقني. أنا عارف من غير ما تقول. ما تزعلش نفسك. روح شوف الصور كلها على الموقع ده المكتوب بالإنجليزي. لو تعبت نفسك و دورت شوية هتلاقي شخرميت موقع تاني بالصيني ناشر نفس الصور.
الصورة دي بقى بتاعة عيال يا عيني بيعيط على أمه اللي ماتت و الناس واقفين بيتفرجوا عليه و عليها. بوذيين بقى كفرة ولاد كلب.
أصلاً الصورة دي في الصين، و الولية دي مش ميتة دي مغمى عليها، و لو دققت في الصورة الأصلية اللي هاتلاقيها في الرابط ده هاتعرف إن اللي خد الصورة قطع الجزء السفلي اللي فيه الكتابة الصيني علشان يضحك على جنابك. و لو تعبت نفسك برضه و دورت شوية هاتلاقي الصورة دي محطوطة في شخرتلاف موقع صيني.
الصورة دي بقى من بورما الشهادة لله علشان ما أبقاش كداب.
إيه اللي حصل بقى في الصورة دي؟ بيقول لك جماعة من الرهبان البوذيين قرروا يعملوا مظاهرة في بورما، فالحكومة هناك ضربت عليهم نار و فشختهم. دول كانوا بوذيين يا عم الناصح. بس أكيد أنا كذاب و العالم دول و كمان العالم دول كذابين ولاد ستين كلب. معلهش بقى. أعداء الإسلام. تقول إيه...!
الصورة دي كمان من بورما على فكرة.
عارف الصورة دي بتاعة إيه؟ بتاعة المظاهرة اللي عملوها الرهبان البوذيين اللي لسه قايل لسعادتك عليها. بتوع النيويورك تايمز ولاد الكافرة نشروا الصورة دي سنة ٢٠٠٧ برضه. شفت أعداء الإسلام بيعملوا إيه؟ ربنا يورينا فيهم يوم.
الصورة دي بقى فعلاً فعلاً من بورما و أنا متأكد من كده. أكيد بقى الصورة دي تقطع القلب و توريك المسلمين بيتدبحوا في الشوارع هناك ازاي.
أصلاً الصورة دي يا برنس البرنسات من إنفجار قنبلة في بورما في فبراير ٢٠١١. الرابط بتاع الخبر أهو علشان مش هاتصدق واحد مفتري و إبن كلب زيي.
الصورة دي بقى أكيد مش مضروبة. يا راجل ده الناس اللي واقفين بيصوروا الجدع الغلبان ده و هو النار والعة فيه و بيجري...!
هي مش مضروبة صحيح. بس إنت تبقى مضروب لو صدقت انها من بورما. الصورة دي من الصين في مظاهرة كانوا بتوع التبت بيولعو في نفسهم فيها. صحيفة التليجراف البريطانية هي اللي بتقول يا عم أنا ما ليش دعوة.
فيه بقى صورتين بشعتين الحقيقة لأطفال مقتولين بطريقة وحشية.
الصورتين دول مش عارف من أنهي داهية في العالم و لا مين إبن الكلب اللي ممكن يكون قتل أطفال بالشكل ده، بس اللي أعرفه إن الصورتين دول منشورين على موقع مكتوب بلغة مش عارف إيه هي و لا جوجل كمان عارف إيه هي، و تاريخ نشرهم نوفمبر ٢٠١١. يعني قبل الهيصة اللي في بورما دي ما تحصل أساساً. آدي الموقع أهو. و أمانة عليك لو عرفت تترجم اللغة دي قول لي.
الراجل المقتول اللي في الصورة دي بقى
بيقول عليه المسلمين إنه مسلم قتله البوذيين، و بيقول عليه البوذيين أنه بوذي قتله المسلمين؟ أصدق مين أنا بقى؟ أروح ورا الراجل أسأله؟
و الراجل ده كمان مات مقتول
المسلمين بيقولوا عليه مسلم قتله البوذيين و البوذيين بيقولوا عليه بوذي قتله المسلمين. تقريباً هو صاحب الراجل اللي في الصورة اللي فاتت، علشان هتلاقي صورتهم هما الاتنين تحت بعض في موقع تاني.
و الاتنين اللي في الصورتين الجايين برضه نفس الموال. مش هاعيد تاني بقى. هتلاقي اللي بيقوله البوذيين في الموقع ده.
الصورتين دول بقى الشهادة لله لمسلمين.
بس دول مش في بورما أساساً. دول في تايلاند. المسلمين كانوا عاملين مظاهرات في جنوب تايلاند (غالباً عاوزين ينفصلوا عن تايلاند)، فالجيش فرق المظاهرة بالعنف و كومهم في عربيات لوري فمات منهم ٨٧ واحد مخنوقين. و آدي صور المعتقلين على الأرض. و آدي صور الجثث بعد ما ماتوا مخنوقين. طبعاً اللي عمله الجيش التايلاندي ده في منتهى الغلط، بالظبط زي اللي عملته الشرطة المصرية في يناير ٢٠١١ و في أحداث محمد محمود. و زي اللي عمله الجيش المصري في أحداث ماسبيرو. أنا عموماً مش هاتكلم كتير في الموضوع ده. حاول تقرا و تشوف المسلمين عاملين إيه في جنوب تايلاند.
و الصورة دي لبعض أفراد الأقلية المسلمة في بورما، بس الصورة مش من بورما. الصورة من تايلاند لبعض اللاجئين اللي حاولوا يدخلوا تايلاند، و الكلام ده كان سنة ٢٠٠٩. و الرابط أهو علشان أنا عارف انك مش هاتصدق.
الصورتين الجايين دول برضه للأقلية المسلمة في بورما.
بس دول لاجئين انقذتهم اندونيسيا بعد ما تايلاند عذبتهم و طردتهم. الموضوع ما لوش دعوة ببورما أساساً. الخبر هتلاقيه منشور على موقع جريدة الجارديان البريطانيا بتاريخ فبراير ٢٠٠٩، و الصور هتلاقيها برضه على موقع الجارديان.
و دول برضه أقلية مسلمة من بورما، بس الصورة دي قديمة من سنة ٢٠٠٧ و ما لهاش أي دعوة باللي بيحصل دلوقت. و الصورة دي أصلاً من منظمة حقوق الإنسان في بورما ذات نفسها، و منشورة في مقال بتدافع فيه المنظمة عن حقوق الأقلية المسلمة.
عاوز تشوف صور من واقع اللي بيحصل في بورما اليومين دول فعلاً؟ اوريك الصور.
في الموقع ده هتلاقي صور للاجئين المسلمين الهربانين في النهر من بورما. مشكلتهم إن ما فيش و لا دولة من الدول المجاورة عاوزة تقبلهم.
أدي لك كمان شوية صور حقيقية من بورما بتعبر عن اللي بيحصل فيها اليومين دول، و مع الصور المواقع اللي الصور متاخدة منها.
و هتلاقي الصورة اللي فاتت في الرابط ده.
و هتلاقي الصورة اللي فاتت في الرابط ده.
و هتلاقي الصورة اللي فاتت في الرابط ده.
و هتلاقي الصورة اللي فاتت في الرابط ده.
و هتلاقي الصورة اللي فاتت في الرابط ده.
و هتلاقي الصورة اللي فاتت في الرابط ده.
و هتلاقي الصورة اللي فاتت في الرابط ده.
و التلات صور اللي فاتت دول هاتلاقيهم في الرابط ده.
و هتلاقي الصورة اللي فاتت في الرابط ده.
الصور الجاية دي في رأيي ممكن تكون حقيقي من بورما في الأحداث الأخيرة اللي حصلت و مات فيها عدد مش قليل من الأقلية المسلمة، بس ما لقيتش مصدر محترم جايب الصور. لكن فعلاً شكلها ممكن تكون من بورما.
الخلاصة إيه بقى يا معلم؟ الخلاصة إن الأقلية المسلمة في بورما مضطهدة من زمان، من ثمانينات القرن العشرين، بس إنت اللي مش واخد بالك من الموضوع ده. و الاضطهاد ده أصله عرقي بالدرجة الأولى أكتر منه ديني، بس تصادف إن الوافدين من بنجلاديش مع الاحتلال الإنجليزي (الروهنجيا) كانوا مسلمين و سكان بورما الأصليين كانوا بوذيين. يعني لو كان السكان الوافدين هندوس كان غالباً هيحصل نفس اللي حصل.
هل معنى كده إن اللي بيحصل ده صح يعني و ميت فل و أربعتاشر و المسلمين هناك عايشين في نعيم؟ لأ طبعاً ما حدش قال كده. مشكلة المسلمين في بورما المفروض كانت تتحل من زمان بصفتهم أقلية مضطهدة مش بصفتهم مسلمين و بس. و آدي الفرصة جت علشان المشكلة تتحط في دائرة الضوء و تتحل.
ما يجيش بقى واحد غبي إبن ستين صرمة قديمة يحط صور متفبركة و يقول لك الحق المسلمين هناك بيتدبحوا في الشارع. لما فيه صور حقيقية بتوضح المعاناة بتاعة الناس هناك، يبقى ما فيش داعي أبداً تفبرك و تخلي مصداقيتك زي الخرا.
و اللي بيعمل شير عمياني لأي صورة و السلام و فاكر إنه بيخدم المسلمين في بورما هو في الواقع بيفشخ المسلمين في بورما بالكدب و التدليس. يعني عاوز أقول لك يا برنس إن لو فيه حد من أعداء الإسلام ما يبقاش أنا. يبقى أي حمار بيعمل شير لأي حاجة و هو مغيب و ماشي زي الخروف ورا أي حد يقول له أي حاجة. في الآخر بقى أحب أقول لسيادتك إن فيه طريقتين تدور بيهم على الصور على الإنترنت. ممكن تروح لباحث جوجل للصور، و ممكن تستخدم "باحث "تن آي، بس جوجل أحسن منه. قبل ما تعمل شير شغل البالوظة اللي في دماغك اللي ربنا اداها لك و اسمها مخ.
ليست هناك تعليقات:
إرسال تعليق