طلعت في دماغي أعمل سلطة فاكهة ، و رحت السوبرماركت علشان أجيب تشكيلة كده و ادلع نفسي ، بس للأسف ما لقيتش هناك غير موز و تفاح . ما فيش سوبرماركت قريب غير ده و أنا عاوز سلطة فاكهة . قلت أجيب الموز و التفاح و خلاص . الموز كويس و أنا باحبه و التفاح كمان زي الفل ، بس أنا عاوز سلطة فاكهة ...! مش عاوز موز بس و لا تفاح بس ، و لا عاوز موز على تفاح ...! خدت اللي كان موجود و قلت مش مشكلة ده برضه أقرب حاجة ممكنة لسلطة الفاكهة ... بس دي مش سلطة فاكهة و ما كنتش مبسوط و لا حسيت اني عملت اللي أنا عاوزه
هو ده اللي احنا عاوزين نعمله بالظبط في إنتخابات مجلس الشعب القريبة دي لو قلنا نعم لتعديلات الدستور . ما فيش احزاب جاهزة علشان تنزل الانتخابات ، و حا نضطر ناخد من اللي موجود و خلاص . الموجود ممكن يكون مش وحش ، بس ده مش التنوع اللي احنا عاوزينه و لا بيعبر عن الشعب بشكل صادق .
خطر اننا نخلي "الموجود" هو اللي يختار أعضاء الجمعية التأسيسية للدستور الجديد ، لأنه مش بالضرورة بيعبر عن الشعب بصدق . هي دي خطورة إجراء الانتخابات البرلمانية دلوقت ... أنا ما عنديش مشكلة إن يكون فيه برلمان مؤقت مش بيعبر "أوي" عن الشعب ، بس عندي مشكلة كبيرة في إن البرلمان ده يختار أعضاء الجمعية اللي حا يحطوا الدستور اللي المفروض يعبر بصدق عن الشعب
ليست هناك تعليقات:
إرسال تعليق